Psa 1 | MNA | STEP | Tomtom pareiŋana ta leleene ambai kat mi kampeŋana ki Anutu imbotmbot se kini? Ina tomtom ta wal sananŋan ŋgar kizin ikamam peeze pini som. Mi wal ta mbulu kizin irao pa Anutu mataana som na, ni itoto zin som. Mi wal tau matan repiili Anutu mi zaala kini na, ni igabgaaba zin som.

aMbo 26:4+

bMbo 112:1, 119:1,35

cUn 49:22; Mbo 52:8, 92:12

dMt 13:41+; Tur 22:14+

eTur 20:15

Psalms 1

Mboe 1

Zaala ambaiŋana mi zaala sananŋana

1 Tomtom pareiŋana ta leleene ambai kat mi kampeŋana ki Anutu imbotmbot se kini?
Ina tomtom ta wal sananŋan ŋgar kizin ikamam peeze pini som.
Mi wal ta mbulu kizin irao pa Anutu mataana som na, ni itoto zin som.
Mi wal tau matan repiili Anutu mi zaala kini na, ni igabgaaba zin som. ^a
2 Ni leleene ambai kat pa sua ta Yooba ikam piti na,
mi ikamam ŋgar pa ikot mbeŋ ma aigule. ^b
3 Tomtom ta kembena, ni kembei ke tau tipaaza sula yok zilŋaana.
Indeeŋe ka nol na, ipiyotyooto ŋonoono ambaimbaiŋan.
Mi sombe zoŋ biibi na, irao runrun imelle na som.
Tana uraata kini ta boozomen ilonloondo ambai men. ^c

4 Mi zin wal zorzooroŋan na, kembena som.
Zin kembei musmuuzu ta miiri iwilaala ma ila ne.
5 Tana Anutu isombe ipamender zin tomtom mi iur kadoono pizin,
na wal sananŋan ko irao timbot na som. Ko tila len.
Zin wal tau mbulu kizin irao pa ni mataana som,
nako irao tigaaba wal kini ndeeŋeŋan mi timbot lela lupŋana kizin na som. ^d

6 Tana wal ndeeŋeŋan na, Yooba mataana pizin mi iurur zaala pizin.
Mi wal sananŋan, nako timbiriizi ma tila len kat. ^e